Plantun de Prouvènço

Pèr coumpara dos planto d'encò nostre

Cyperus glomeratus & Scleranthus annuus

Cyperus glomeratus

Cyperaceae

Nom en français : Souchet aggloméré.

Descripcioun :
Aquéu triangle, dis espigueto agloumerado emé sa cambo levado e lisco, e segur di tres coustat, nous vèn di relarg quàsi troupicau. Pòu faire fin qu'à 80 cm d'auturo. Au bout de pecou, mai o mens loungaru, s'atrobon lis espigueto brunello e proun sarrado que formon un brout en oumbello. Se rescontro subretout sus li limas en ribo d'aigo dins la "Valado dóu Rose" (Rose e Durènço).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 20 à 80 cm
Fueio : costo paralèlo
Tipe bioulougico : Eloufite
Cicle bioulougico : Planto renadivo

Gènre : Cyperus
Famiho : Cyperaceae

Ordre : Poales

Coulour de la flour : Brunello
Petalo : ges
Ø (o loungour) enflourejado : 1 à 10 cm
Flourido : Estiéu - Autouno

Sòu : Ca
Autour basso e auto : 0 à 100 m
Aparado : Noun

Liò : Ribiero
Estànci : Mesoumediterran
Couroulougi : Óurigino paleousubtroupicalo
Ref. sc. : Cyperus glomeratus L., 1756

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.